مفيش رجوع !!

أنا مواطن مصري أقر وأنا في كامل قواي العقلية، إني هدافع عن الشعب المصري ضد الظلم والقهروالسلبية والاستعباد، ضد كل حاجه ممكن تسلب حقوقة.
وأخيراً ضد العدوان 

مفيش رجوع.. دي ثورة بعد جو جايين ناخد بتارنا تمن الدم و الدموع

مش هنقبل غير وقوفنا كلنا وقت الشروق
إيد في إيد بقلب دامي نتحد ما فيش فروق

الأماني في العروق بتتحول لعلم مصر
أحمر و أبيض و إسود متشبع بروح النسر

مهما قالوا عن كلامي مفتعل أو شعارات
هفضل أخلق الذريعة اللي تدمر الانكسارات

سلاح عدوي هو يأسي من أمل قريب
و طول ما فيا قدرة التنفس مش هغيب

الميدان صوت القلوب النقية و العقول
مفيش مكان في بلدي للمخرب و الفلول

يلا نوجد الأمل حتى لو من العدم
عشان هتندم لو ضعفت يوم ما ينفع الندم

بنتوحل في كل درب لسه عشان طريقنا واعر
استمد قوتك من العزيمة و المشاعر

مفيش رجوع
حرية ، عدالة ، نزاهة ، كرامة
العزيمة قيمة و الصمود جبل

وسط الجموع
إرادة ، كفاح ، مضادة للنباح
إكسر السلاسل إوجد السبل

مش هتدبل الورود مش هينطفي الصمود
مش هيبطل حفيدي يحكي اللي عمله الجدود

انتفضنا للمقاومة جيل ما يعرفش الهزار
نسترد كل حق خلاص بقى القرار

مفيش هروب مفيش فرار قبل راية الانتصار
قبل ما السعادة تتولد في كل دار و دار

قبل ما كل أرض بور في مصر تتحول خضار
قبل ما أبدأ ارسم وش مبتسم على الجدار

تنتصر أو تندفن ليك حرية الاختيار
انا عن نفسي هفدي نفسي و انا بعدل المسار

هفك أسر كل روح سجينة في المغارة
مفيش مجال نشك أو نكون ساعات حيارى

الأمل سلاح مدمر لو نوجهه لهدف
انتهت طريقة ترك كل حاجة للصدف

و هنتصر في كل حرب عشان قضيتي عادلة
الجريمة و العقاب هبدأ أوزن المعادلة .. مفيش رجوع !
======================